أشكال الستائر وحجمها اختلف عن زمان لأن زمان كانت ارتفاعات الحوائط داخل المنزل عالية لكن الآن معظم الشقق ارتفاعاها قليل وعشان كده شغل البراقع تراجع شوية بالإضافة إلى إن الموضة بالنسبة للستائر اختلفت وأصبحت هناك ستائر مطرزة جاهزة وستائر برنت شوب "مطبوعة" وستائر مشغولة وستائر "قصة الجبير" بالإضافة إلى إن شغل التطريز والسجأ والفرنشات والعقادة غير من شكل الستائر بجانب طبعا الستائر المعدنية والرأسية والسينمائية والبامبو ودايما اختيار الستارة بيرجع لذوق البنت وشكل شقتها واستايل الموبيليا بتاعتها ولذلك أنصح بتصميم الستائر بعد عمل ديكور الشقة واختيار الموبيليا والسجاد يعني الستائر آخر حاجة تتعمل وعلى فكرة الستائر دلوقتي بالريموت كنترول.
إيه الأشكال الحديثة من "البلتكانات"؟!
البلتكانة زمان كانت عبارة عن خشب وبها مجرى ودلوقتي بيطلق عليها تراك "التراك إما يكون يدوي أو حبل" والتراك اليدوي فيه منه مصري وألماني وأمريكي ومنه "صاج وألمونيوم" والتراك الكويس لازم تكون العجلة بتاعته سهلة وتجري بسرعة من غير صوت أثناء جري الستارة ده غير التراك الفورفورجيه والماسورة العادية التايواني اللي بتتميز بأنها لا تصدأ والماسورة الخشب الأويما اللي ليها شكل قيم علشان كده بنلاقيها غالية شوية وفي النهاية اختيار التراك يتوقف على شكل الستارة وتصميمه.
إيه أحدث خامات الستائر دلوقتي؟!
خامات الأقمشة التي تناسب جوانب الستائر والبورد بيكون قماش سادة تفتا أو قطيفة أو شانيليا وبيتعمل عليها شغل وتطريز أو قماش جاكار وحرير مطرز ومشغول أما الستائر الخفيفة اللي بتكون في النصف بين الجوانب فيه منها أورجانزا مشغولة أو سادة أو مفرغة أو مطرزة أو ستائر حرير طبيعي أو كتان أو قماش مطبوع أو فوال سادة ومقلم.
بنسمع عن القماش الهندي والإيطالي والتركي إيه الفرق بين كل نوع من الأقمشة دي؟!
الفرق بيكون في الأسعار والجودة وعلى فكرة القماش المصري دلوقتي كويس جدا ولكن بشكل عام القماش الإيطالي والتركي واليوناني بيكون في الأورجنزا أما الهندي فبيكون في الستائر والأقمشة المشغولة. وعلى فكرة الفرق بين القماش الهندي والمصري بيكون في الملمس لكن مفيش اختلاف كبير والواضح في السوق إن الصين بدأت تغزو الأسواق بالأورجنزا السادة بأسعار قليلة جدا.
إيه ألوان الستائر الموضة دلوقتي؟!
ألوان الأبيض والأسود والأوكسديه هي الألوان الأولى في عالم الستائر بالإضافة إلى ألوان زي النبيتي والبني والموف والبيج والذهبي والأوكسديه ميزته إنه بيمشي مع كل بيت ومش لازم اللون بتاع الستارة يطابق لون الفرش بالضبط يعني مثلا لو الأنتريه نبيتي الستارة تكون أوكسديه ومطرزة نبيتي بالإضافة إلى إن اختيار التركواز بيكون مع الأوكسديه وأكثر الستائر موضة قوي دلوقتي هي الستائر الخيوط والكريستالات. الأشكال الحديثة للعقادة والفرنشة والرابطة عاملة إزاي؟! العقادة والفرنشة أصبحت كلها كريستالات وخرز والعقادة الخيط تراجعت شوية أما المربط بيأخذ من شكل العقادة والفرنشة ولكن على شكل أكبر وبيكون على أطراف جوانب الستارة أو على جانب واحد وتتميز أن حجمها كبير قوي.
السجأ عبارة عن إيه؟!
السجأ عبارة عن بلتكانة أو قطعة طويلة من الخشب مشدود عليها قماش مطرز وفرنشة وعرضها 35 سم وبها أشكال جمالية كثيرة وداخل فيها كريستالات ونحاس وبتكون مساحتها على حسب مساحة الستارة والسجأ كلها هاند ميد مصنوع على نول والعقادة والسجأ والفرنشة برضه هاند ميد من ألوان الستارة نفسها ويوجد كتالوج بيكون فيه أشكال كثيرة من السجأ والعقادة والعميل بيختار الشكل المناسب لاستايل ولون الستارة بتاعته والسجأ بيستخدم في حاجتين في الأنتريهات والكنب الأمريكي. إيه أحدث خامة "للبلاك أوت" وهل لازم يكون مع كل ستائر البيت؟! "البلاك أوت" الأمريكي والأسترالي أحسن حاجة في السوق وبيكون مستورد وعادة بيكون قماش معتم من طبقة أو ثلاث طبقات ودرجة التعتيم بتاعته بتكون 100% وممكن يتغسل بسهولة ولازم "البلاك أوت" يكون وراء كل الستائر لأن الستائر دلوقتي معظمها خفيفة وأورجانزا ولما بتتعرض للشمس بعد حوالي سنتين بتتشقق علشان كده "البلاك أوت" بيحمي كل الستائر.
إيه الستائر اللي بتناسب المطابخ والحمامات دلوقتي؟!
المطابخ بالذات بيتناسب معها "شيش حصيرة" لأنه سهل غسله بسفنجة وصابون لأن طبعا القماش بيتأثر بالزيوت وبخار الطعام أما ستارة الحمام أفضل حاجة هي الستارة الووتر بروف.
إيه الستائر اللي بتناسب غرفة النوم للكبار والأطفال؟!
غرفة نوم الكبار بيتناسب معها الستائر الناعمة والفوال والأورجنزا والبراقع بتاعتها بتكون تكسير وكشكشة واختيارها بيكون على حسب لون واستايل الغرفة أما غرفة الأطفال بيتناسب معها ستائر خفيفة فوال أو حرير ومرسوم عليها بطوط وميكي ورسومات أطفال أو قماش مطبوع.
هل ستارة الشبابيك بتكون من نفس ألوان وتصميم الستارة الأساسية؟!
ستارة الشباك لازم تكون من نفس التصميم لكن ممكن نعملها بجنب واحد وممكن نغير في شكل العقادة لكن لازم يكون من نفس التصميم والألوان.
إيه الفرق بين الستائر المعدنية والستائر الرأسية؟!
الستائر المعدنية هي شرائح من الألمونيوم مدهونة "بالإلكتروستيك" ومقاساتها مختلفة منها 5 سم 3.30 سم 2.30 سم 12ملي وتناسب أماكن معينة زي الشركات المكاتب العيادات وتساعد على دخول الإضاءة بكميات معينة وتناسب المنازل التي بها غرف مسلطة عليها الشمس لأنها تساعد على حجب الشمس. أما الستائر الرأسية هي ستائر رأسية من القماش "الفايبر المعالج" عرضها من 12.7 سم إلى 11 سم بأي ارتفاعات وألوانها متعددة.
هل الستائر "البامبو" تناسب مساحات معينة من الشقق؟!
الستائر البامبو عبارة عن "الحصير القديم" ودلوقتي بقت حصير طبيعي وألوانها متداخلة مع بعضها وممكن يتعمل منها "فرنشات" زي البراقع لكن بتناسب مساحات واسعة زي الشاليهات والفيلات والقرى السياحية وشكلها بيكون حلو على الشبابيك وبتمنع الضوء والحشرات.
وهل فيه ستائر بتكون عاكسة للحرارة وتلطف جو الشقة؟!
الستائر البليسيه من ضمن أنواع الستائر العاكسة لأشعة الشمس وهي عبارة عن ستائر قماش والخلفية بتاعتها سيلفر وهي عاكسة للحرارة وعرضها 2 متر ومتنية فوق بعضها وبتناسب غرفة المعيشة وغرفة الأطفال. بنسمع كثير عن "ستائر الرول" بتكون عاملة إزاي؟! ستائر الرول عبارة عن قطعة قماش "صني سكرين" وهو قماش مسقط خفيف عبارة عن طبقة قماش وطبقة جلد والقماش كله نازل قطعة واحدة عرض 2 متر وبارتفاعات وألوان كثيرة جدا.
وأخيرا إزاي أحافظ على نظافة ولون الستائر فترة طويلة؟!
أنصح بعد فرش الشقة وتركيب الستائر لابد أن نرشها بمادة تسمى "سكوتش جارد" وهي عبارة عن مادة عازلة تحميها من الاتساخ والأتربة ووقوع الشاي والقهوة وهي مادة صحية لكن أنصح برشها قبل دخول العروسة البيت بحوالي خمسة أيام وبكده تحافظي على الستائر العمر كله.
نبض الحياة Admin
عدد المساهمات : 52 تاريخ التسجيل : 22/07/2009 العمر : 32 الموقع : الاردن
موضوع: رد: الاستيلات الحديثة لديكور الستائر الجمعة 24 يوليو 2009, 8:12 am
شكرا لك ولمجهودك المميز مشكووووووووووووووورة
ميووش Admin
عدد المساهمات : 102 تاريخ التسجيل : 22/07/2009 العمر : 31 الموقع : الاردن
موضوع: رد: الاستيلات الحديثة لديكور الستائر الأحد 26 يوليو 2009, 7:52 pm
موضوع: الاستيلات الحديثة لديكور الستائر 
الخميس 23 يوليو 2009, 8:36 pm
